ये मेरा
ये माटा मी
इन रच्युं छों
इन बस्यूं छों
जनी व्हालो यो जीयू मेरु
ये डंडा कांडा
मेरा बाजू छन
ये हिमाला मेरु
शीश मुखुट छन
ये भागा मी
इन दड़यूँ छों
इन लग्युं चों
जनी व्हालो यो सरीर मेरु
ये बुरांस ये प्योंली
ये लया ये पंया
ये घुघती हे हिलांसा
मेरा साज श्रृंगार छन
ये अंग मा मी
यूँ भिज्युं छों
यूँ फुल्युं छों
जनी व्हालो ऋतू कि बाहार
ये गौं ये पुंगडा
ये पंतेद्र ये घाटा मेरा
अपरा ऊ परै मेरा
कन चलदी ऊ माया ब्यार
ये बथों मा
ऊ म्यल्दी बाटों मा
उकलो उंदरुं मा गिजयूं मी
जनी वाहलो यो मेरु
ये माटा मी
इन रच्युं छों
इन बस्यूं छों
जनी व्हालो यो जीयू मेरु
एक उत्तराखंडी
बालकृष्ण डी ध्यानी
देवभूमि बद्री-केदारनाथ
मेरा ब्लोग्स
http:// balkrishna_dhyani.blogspot.com
में पूर्व प्रकाशित -सर्वाधिकार सुरक्षित
बालकृष्ण डी ध्यानी
0 टिप्पणियाँ