तेरी माया मा

तेरी माया मा

तेरी माया मा तेरी माया मा
पाड़ों कि हैर भैर छैया मा
उकाळु ऊंदरू बाटों ते आली भेंटि
तेरी माया मा तेरी माया मा

बौल्या बणाई रौलूँ पुंछेई
अपरा अपरि मा मि यखुली बणाई
हर्चि सूद बूद मेरि लगि बस तेर खुद
तेरी माया मा तेरी माया मा

किद किद हैसणी दांतों दतुली
लग्दि रैंदी अब विंकी बडूली
चमचमकी विं आँखि अंधुरू जिकुड़ी
तेरी माया मा तेरी माया मा

मुळ मुळ फूलणी ऊ बुरंसी मुखडी
किन्गोड़ा कि दाणी मेर हिंसोला कि गाणी
काफल खैकी वि घुघती मैसे छुईं लगाणी
तेरी माया मा तेरी माया मा

ठंडू मिठु पाणी सि हिलांसी माया मेरी
ह्युंद सी जमी पाड़ों माथा पौड़ी माया मेरी
गदनी जनि बगती जांद खोलों थे अटकी जांद
तेरी माया मा तेरी माया मा

बसि वा मेर दगड इनी
जियु स्वास कि जसी च वा मेर लड़ी
रै तू मै दगड इनी हि सदनी बसि
तेरी माया मा तेरी माया मा

एक उत्तराखंडी

बालकृष्ण डी ध्यानी
देवभूमि बद्री-केदारनाथ
मेरा ब्लोग्स
http:// balkrishna_dhyani.blogspot.com
में पूर्व प्रकाशित -सर्वाधिकार सुरक्षित

बालकृष्ण डी ध्यानी